B.B, kandidati që thotë se nuk ka konkurrent për muskuj e karizëm, ka shpallur betejën më madhështore të fushatës atë për çlirimin e Prishtinës nga qentë endacakë. Sipas tij, kjo nuk është veç një punë urbane, por një projekt kombëtar, shkruan Infiltrim, raporton Pordhtali.com.
“Unë i kom identifiku qentë, një nga një. E di cilin kah e ka bishtin, cilin kah e kthen veshin. Askush para meje nuk ka guxu me i dallu” , ka deklaruar ai me një ton prej gjenerali që flet para ushtarëve.
B.B – e bon vet, ka treguar se nga analiza e tij e hollësishme, qentë e Prishtinës janë të ndarë në dy kategori në ata që kanë ardhur nga Podujeva dhe ata që kanë lindë e rritë në kryeqytet.
“Qentë llapjanë i dallon shpejt. E kanë hapin e gjatë, sikur kanë ardhë prej malit. Ndërsa këta të Prishtinës, janë ma të qetë, ma urbanë. Dinë ku asht kafiteria, ku ka byrek, e nuk kanë nevojë për navigator”.
Sipas tij, qentë autoktonë të Prishtinës nuk janë kategori e zakonshme.
“Ata janë rugovistë. I dallon prej tjerëve, pasi nuk bëjnë zhurmë, nuk kafshojnë, veç rrinë me sy të butë e të qetë. Janë qentë me traditë, me familje, me rregull. Nuk dalin natën pa arsye. Janë shembulli i disiplinës qytetare”.
Ndërsa qentë që kanë ardhur prej Podujevës, B-B nuk ka kursyer kritika:
“Qentë e Llapit janë të rrezikshëm. Vijnë grupe-grupe, kanë energji të tepërt, nuk e njohin urbanizmin. Janë si kolonizatorë. Nëse s’i ndalim, për tre vjet na e pushtojnë krejt Prishtinën e na e ndërrojnë edhe demarkacionin”.
Sipas tij, çdo qen do të ketë numër personal, fotografi dhe kartelë biometrike.
“Qeni llapjan ka shenjë të veçantë në kartelë. Qeni rugovist ka stemën e Rugovës. Ndërsa qeni autokton i Prishtinës merr vulën e qytetit. Kështu, kur të të ndjekë një qen rrugës, ti e di se a je ndjekur prej një rugovisti që të don, apo prej një llapjani që s’e ka me të mir?”.
Por B.B nuk ndalet me kaq. Ai ka paralajmëruar transformimin e ish-palestrës Boro Ramizi në strehimore për qentë endacakë.
“Qentë rugovistë aty kanë suitat VIP, me dyshek ortopedik e ushqim bio me kryeshef Imset Beqirin. Ndërsa llapjanët, përkohësisht n’palestrën e vogël, derisa t’i kthejmë prapa kufirit natyral te Gërmia, që ndodhet me territor në Podujevë”.
Në përmbyllje, B.B ka theksuar: “Unë nuk jam kundër qenit. Unë jam kundër kaosit. Qeni rugovist është i mirë, i mençëm, i kulturun. Qeni llapjan duhet edukuar ose kthyer. Ky është vizioni im. Ky është B.B – e bon vet”. /Pordhtali.com/
Leave a Reply